ဂျပန်စာသင်ယူမှုကို ဘယ်လောက်အထိ သင်ယူသင့်ပါသလဲ။
-------------------------------------------------------------------------------------
အခြေခံအဆင့် (ပထမပိုင်း) N5 Level ကို
သင်ယူသင့်သောသူဆိုသည်မှာ...
ဂျပန်စာကို သင်ယူမည်ဟု စိတ်ဆုံးဖြတ်ပြီးပါက မည်သူမဆို
အခြေခံအဆင့်(ပထမပိုင်း) N5 Level ကို သင်ယူကြရပါမည်။
N5 အဆင့်သည် အလွယ်ကူဆုံးအဆင့်ဖြစ်ပါသည်။
N5 အဆင့်တွင် စာရေးနည်း၊ စာဖတ်နည်းများကို စတင်သင်ယူပြီး၊
N5 အဆင့်အတွက် သတ်မှတ်ထားသော ဖတ်စာအုပ်တစ်အုပ်အုပ်ကို သင်ယူရပါမည်။
ထို့နောက် တရုတ်ခန်းဂျိစာလုံး အလွယ်ကူဆုံး အလုံး ၁၀၀ ခန့်ကို သင်ယူရပါမည်။
ထိုသို့ သင်ယူမှုပြီးဆုံးပါက စာမေးပွဲမေးခွန်းဖြေဆိုနိုင်ရန်အတွက် မေးခွန်းဟောင်းများကို လေ့ကျင့်ရပါမည်။
မေးခွန်းဟောင်းလေ့ကျင့်မှုအားနည်းပါက စာရပါသော်လည်း စာမေးပွဲမဖြေနိုင်ဖြစ်တတ်ပြီး စာမေးပွဲမအောင်မြင်ဖြစ်တတ်ပါသည်။
-------------------------------------------------------------------------------------
အခြေခံအဆင့် (ဒုတိယပိုင်း) N4 Level ကို
သင်ယူသင့်သောသူဆိုသည်မှာ...
ဂျပန်စာအခြေခံအဆင့်(ပထမပိုင်း) N5 Level ကို သင်ယူပြီးမြောက်ထားသောသူဖြစ်ရပါမည်။ ဂျပန်နိုင်ငံတွင် ကျောင်းတက်ရောက်လိုသောသူ၊ ဂျပန်နိုင်ငံတွင် Tokutei ကျွမ်းကျင်လုပ်သားအဖြစ်သွားရောက် အလုပ်လုပ်ရန် ဆုံးဖြတ်ထားသူများသည် အနည်းဆုံးဂျပန်စာကို အခြေခံအဆင့် (ဒုတိယပိုင်း) N4 Level အထိ တက်ရောက်ထားသင့်ပါသည်။
N4 အဆင့်သည် N5 အဆင့်ထက်အနည်းငယ် ခက်ခဲမှုများရှိပါသည်။
N4 အဆင့်အတွက် သတ်မှတ်ထားသော ဖတ်စာအုပ်တစ်အုပ်အုပ်ကို သင်ယူရပါမည်။ အနည်းငယ်ခက်ခဲသော သဒ္ဒါပုံစံများကို သင်ယူရပါမည်။
တရုတ်စာလုံး ခန်းဂျိများလည်း ယခင်ကထက် ၂ ဆခန့် လေ့လာရပါမည်။
ခန်းဂျိအလုံး ၂၀၀ ခန့်ကို သင်ယူရပါမည်။
ထိုသို့ သင်ယူမှုပြီးဆုံးပါက စာမေးပွဲမေးခွန်းဖြေဆိုနိုင်ရန်အတွက် မေးခွန်းဟောင်းများကို လေ့ကျင့်ရပါမည်။
မေးခွန်းဟောင်းလေ့ကျင့်မှုအားနည်းပါက စာရပါသော်လည်း စာမေးပွဲမဖြေနိုင်ဖြစ်တတ်ပြီး စာမေးပွဲမအောင်မြင်ဖြစ်တတ်ပါသည်ကို လုံးဝမမေ့ပါနဲ့။
အထူးကျွမ်းကျင်လုပ်သား Tokutei ဖြင့်ဂျပန်သွားလိုသောသူများသည် JLPT - N4 Level စာမေးပွဲကို အောင်မြင်ပြီးမှသာ Tokutei ကျွင်းကျင်လုပ်သားနှင့် သက်ဆိုင်သော စာမေးပွဲကို ဖြေဆိုနိုင်မည်ဖြစ်သောကြောင့် JLPT - N4 အဆင့်စာမေးပွဲကို သေချာပေါက်အောင်မြင်ထားရမည်ဖြစ်သည်။ ယခုအခြေအနေအထိ အခြားစာမေးပွဲအောင်လက်မှတ်များကို လက်မခံသေးပါ။
-------------------------------------------------------------------------------------
အလယ်အဆင့် (N3 Level) ကို
သင်ယူသင့်သောသူဆိုသည်မှာ...
ဂျပန်စာအခြေခံအဆင့်(ဒုတိယပိုင်း) N4 Level ကို သင်ယူပြီးမြောက်ထားသောသူဖြစ်ရပါမည်။ ဂျပန်နိုင်ငံတွင် ကျောင်းတက်ရောက်လိုသောသူ၊ ဂျပန်နိုင်ငံတွင် Tokutei ကျွမ်းကျင်လုပ်သားအဖြစ်သွားရောက် အလုပ်လုပ်ရန် ဆုံးဖြတ်ထားသူများသည် အလယ်အဆင့် (N3 Level) ကို ဆက်လက်တက်ရောက်ထားပါက အင်တာဗျူးများတွင် အခြားသူများထက် သာလွန်သောအခြေအနေ၊ ကောင်းမွန်သောရလဒ်ကို ရရှိနိုင်ပါသည်။
N3 Level သည် အတော်အတန်ခက်ခဲသောအဆင့်ဖြစ်ပါသည်။
ယခင် N5, N4 အဆင့်တွင် စာအုပ်တစ်အုပ်ကိုသာ သင်ယူရန်လိုသော်လည်း N3 အဆင့်တွင် သင်ယူရမည့်စာအုပ်များသည် ၅ အုပ်ခန့်ဖြစ်လာပါမည်။ စာအုပ်အမျိုးအစားများလည်း များပြားလာပါသည်။ လွယ်ကူသောစာအုပ်အတွဲများရှိသလို၊ အတန်ငယ်ခက်ခဲသောစာအုပ်အတွဲများလည်း ရှိပါသည်။
အောင်မှတ်ရရုံအတွက်သာ လုပ်ဆောင်မည်ဆိုပါက NIHONGO SO-MATOME စာအုပ်များကိုဖတ်ရှုနိုင်ပါသည်။ သို့သော် စာကို သေသေချာချာ လေ့လာမှတ်သားလိုပါက SHIN KANZEN MASTER စာအုပ်အတွဲများကိုလေ့လာနိုင်ပါသည်။ အချို့သောကျောင်းသားများသည် SHIN KANZEN MASTER နှင့် NIHONGO SO-MATOME နှစ်မျိုးလုံးကို တွဲပြီးဖတ်ရှုလေ့လာကြပါသည်။ ခန်းဂျိစာလုံး အလုံး ၃၀၀ကျော် မှတ်သားလေ့လာရန်လိုအပ်ပါသည်။
N3အဆင့်ကို အောင်မြင်ပြီးသောသူများအတွက် ဂျပန်သို့ ကျောင်းဖြင့်သွားသည်ဖြစ်စေ၊ အလုပ်ဖြင့်သွားသည်ဖြစ်စေ၊ မြန်မာနိုင်ငံတွင် ဂျပန်နှင့်ပတ်သက်သည့်အလုပ်များတွင်ဖြစ်စေ ဝင်ရောက်လုပ်ကိုင်နိုင်ပြီဖြစ်ပါသည်။ N3 အဆင့်သည် ခက်ခဲသော်လည်း အမှတ်တကယ်ကြိုးစားသူအဖို့ အောင်မြင်နိုင်ပြီး၊ ဂျပန်စာဖြင့် ဝင်ငွေရှာနိုင်ရန် လမ်းစပွင့်သွားပြီဖြစ်ပါသည်။ ထို့ကြောင့် N3 အဆင့်ကို အောင်မြင်အောင် ကြိုးစားရန် တိုက်တွန်းအပ်ပါသည်။
-------------------------------------------------------------------------------------
အထက်အဆင့်-အကြို (N2 Level) ကို
သင်ယူသင့်သောသူဆိုသည်မှာ...
ဂျပန်စာအလယ်အဆင့်(N3 Level) ကို သင်ယူပြီးမြောက်ထားသောသူ၊ အောင်မြင်ပြီးထားသောသူဖြစ်ရပါမည်။ ဂျပန်နိုင်ငံတွင် Work Permit ဖြင့်သွားရောက် အလုပ်လုပ်ရန် ဆုံးဖြတ်ထားသူများ၊ မြန်မာနိုင်ငံရှိ ဂျပန်နှင့်ပတ်သက်သည့်လုပ်ငန်းများတွင် ဝင်ရောက်အလုပ်လုပ်ကိုင်လိုသူများ၊ ဂျပန်စာဖြင့်အသက်မွေးဝမ်းကျောင်း ပြုလုပ်လိုသူများ၊ ဂျပန်စာကို ရူးသွပ်သူများသည် အထက်အဆင့် - အကြို (N2 Level) ကို ဆက်လက်တက်ရောက်သင့်ပါသည်။
N2 Level သည် ခက်ခဲသောအဆင့်ဖြစ်ပါသည်။
N2 အဆင့်သို့ရောက်ရှိလာသောသူများသည် ဂျပန်စာနှင့် ပတ်သက်ပြီး ရည်မှန်းချက်ကြီးမားသူများ၊ ကြိုးစားလိုစိတ်ရှိသူများ၊ မိမိဘဝတိုးတက်လိုသူများ၊ ဂျပန်စာနှင့် ဝင်ငွေရှာမည့်သူများ၊ ဂျပန်စာကို ရူးသွပ်သူများဖြစ်သောကြောင့် ထူးထူးထွေထွေ ပြောစရာမလိုတော့ပါ။ သင်ယူရမည့်စာအုပ်များလည်း များပြားလှပါသည်။
အချိန်ရလျှင် ရသလို ကြိုးစားရန်သာတိုက်တွန်းအပ်ပါသည်။ ခန်းဂျိများလည်း အလုံး တစ်ထောင်ကျော်လေ့လာရန်လိုပါသည်။ စာမေးပွဲမေးခွန်းများကို ဖြေဆိုရာတွင် မြန်မာတစ်ယောက်၏စိတ်ကူးစိတ်သန်း၊ ဆုံးဖြတ်ချက်၊ အကြံအစီဖြင့် မဆုံးဖြတ်ပဲ ဂျပန်တစ်ယောက်၏ စိတ်ကူးစိတ်သန်း၊ ဆုံးဖြတ်ချက်ကို သိအောင်လုပ်ပြီး မေးခွန်းကို ဖြေဆိုရန်အကြံပြုအပ်ပါသည်။
N2 အဆင့်အောင်မြင်ပြီးပါက သင်သည် ဂျပန်စာမေးပွဲနှင့်ပတ်သက်ပြီး ဆရာကြီးတစ်ယောက်ဖြစ်လာတော့မည်ဖြစ်ပါသည်။ N2 စာမေးပွဲ အောင်မြင်သွားသော သင့်အား
おめでとうございます。ဟု ဂုဏ်ပြုစကားကြိုတင်ပြောကြားလိုက်ပါရစေ။
-------------------------------------------------------------------------------------
အထက်အဆင့် (N1 Level) ကို
သင်ယူသင့်သောသူဆိုသည်မှာ...
ဂျပန်စာနှင့်ပတ်သက်ပြီး ဆရာကြီးတစ်ဆူဖြစ်လိုသောသူများ ဖြေဆိုသင့်ပါသည်။ ဆရာကြီးဖြစ်လာမည့်သူအတွက် မည်သို့မျှမှတ်ချက်ပေးရန် မလိုပါ။ ဆက်လက်ကြိုးစားရန်သာ အားပေးလိုက်ပါရစေ။ ဂျပန်စာကို မိမိကြိုးစားခဲ့သလို အခြားသူများကိုလည်း ကြိုးစားလာစေရန်၊ လက်တွဲခေါ်ဆောင်ပေးပါရန် အကြံပြုအပ်ပါသည်။
ありがとうございます。
ဆရာဆက်ပိုင် (ERIN)
0 Comments:
Post a Comment